Satlia Chhuasa Fachhai zy hawta hla nata bie athai kawpa châ mawhsala cha, Machâ reih thlôh kawpa nata palâ kawpa hmâpa ta vaw chapai awpa eibyuh ngâsâ. Anodeikua hla nata bie thai kawpa zy he lapinô hmô nawpa kyh liata vaw phahnai hlei vei. Phahnaipa châsala cha Chhuasa Fachhai zy, Robert B Syuhlô zy he lapinô hneipa ta saw liahsa ama sa khai habâ aw! Avaw phahnai leipa tlai achâ thlyu aw? Tahmâ taihta ama hmô thei vei hezaw!!Chavâta he tana heta eiphana rakhata tlao vaw roh sala eimâ thôkhei via nata khâchâ ei hnabeiseih.
Biezao leipa pi ta, atamy noh avaw chhipa cha eipalô tlai âvaw lie kaw bao! “Khazia maw cha tlupo ta na palô cha âlie haw?” tahpa tan a hiahri maw eisala cha âchhy aru kaw aw. Anodeikua, eina hiahri raruahpa a châ khia, kâchhie kawna chô ta “Ei einawhpa HC.Malsawmthanga vâ-ianô cha, âchuna pazao awpa ta Pune pangaipa ta asie ha...” tapa ta âchhy nata ama noh-âh kaw aw! Viasazy khopanô vâpa ta palô âlie thlâ hapa cha no-ah chhao âchhi kaw. HC.Malsawmthanga nata keima he laihsa nazy ta cha “Abie nata Sawma hela... amah mi la pha taraw vei ny; anodeikuala, âmo liata kho-iah aypa he a iah azai pasa kaw” tahpa ta thokhazy ta ama za reih tyhpa chhao ama y taraw! Anodeikua, keimo pano he cha uthei viapi eima palôh â-icha via tahpa châ pita, Satlia Beirahly (Paw Râhly) zy hawta palôh azaw vyupa châ mawh sila cha, kha hawta maniah atahtuhpa nazy kha eima zaw thlu lymâ thlyu aw. Anodeikua, pakha châta khâchâ ngâchhipa eima châ vâna heta ‘kyhpachâna’ ama tahpa he eima lapasaw kaw. Sawma chhochhi he cha aparu lâta a Hostel liata a siku hawtina zy hmô leina liata raithlih apalo ngâkaw tyh. He bie he ado nata do lei a pahnopasiatuhpa cha a personal secretary Satlia Hrehmô a châ.
Akheihawpa rai avaw châ hapa chhao ta, atakô kô 2014 he cha Siaramo nata Deiva chhôkha nazypi ta eima kô phuhpa ‘LAPINÔ HNEI KÔ’ tahpa he khâchâ ahlao patlohsatuhpa châ eima chhua chyu awpa châsala. Apachaihpa ta he nazy heta hnei cheingei eisala tahpa he kho âchhi ngâsa. Heizy hawta ama hmi nata sâ pha kawpa nata asamie samâ kawpa châ mawh eisala cha âmâ para âh leipa chhaota pahno thai âchhi. Chyhsa zy chhao ta, “Ano la ahmi nata sâ zy ta âchu kawta pachâ chhie âchhih vei, lapinô pha kawpa ahnei thlâ ha aw” ama ta aw. Anodeikua, Beihrua Lodua zy, Chhuasa Fachhai zy, Beirahly (Paw Rahly) zy, Robert B.Syuhlô zy he cha heih zy hawta ama hmi nata sâ ta âchu tlô leipa ta ama hnei para awpa ângiah habâ. Keimozy he cha chhie kaw taraw hra eisila tlaikao biereisa ta “ ngaihdam” thei eima châ hleikhô ta, eima kô nata thlazy ta za hâti chy ta pachâ chhie tu awpa muarua châ vei.
‘Old is Gold’ tahpa he âmâ pahniehna biepipa a châ thlyu aw. Mongyuh nazy châta cha he bie he âsu kaw. Machâ uthei via laih eita, ama lathli pachânazy apaso via tyh. Keimo Marasawzy châta cha âpahnieh n’awpa chi châvei. Uthei viapi hru via laihpi atapa chi nata pho eima châ, eima niebawpa ta achhie, eima hmi achhie via laih ngâkaw. Chavata, khi ei reipa nazy ta atakô chhôta Lapinô âmâ phuhpa rakha chyu ama hnei cheingei awpa abyuh (âphuhpa chhao ama hnei tly ma?) Atakô chhao ama hnei leipa a châ khia cha ama yna vaih nata khitlâzy ta, ahrupa hawta ama pasipasawh habâ aw.
John K.Rema nata Hrehmôh Chohza (Patrick) zy hela lapinô hnei awpa ta pasyupali âmâ ngiah tupa chhao pahno vana. Eima pahno leipa nata eima pangiasa leipa ta ‘Paw’ ama châ thlâ ha ngyu thei. He chôchâh hela bierupa a châpa hnaita rei khao awvana. Ama yna Local Church ta zy hma ‘chahry’ pathlei tlamaw ha eisala, amaohphaohna to ho vana.
Akhei hawpa rai a châ hapa chhao ta e, atakô he cha eima zydua châta kô phapa kô a châ chyu nata khâchâ ahnabeiseih chyu eisila, atlâhpata eima y khia cha eima kôphuahpa ‘Lapinô hnei kô’ tahpa chhao he a hlao tloh cheingei nata ei pangiasa. Awnanopa heta dâh pathaih leipa, dâh 2 na ta lapinô ârâ kheipa/ahneipazy ama chahry ngâh nota, nieparu bawparu hmâpa ta âdo lei kawpa ta sôh lapangia ta, chhyna-o sa nawpa, awnano-pa thyuna athyutuhpazy chahry ngâh hei tlô leipa eita, cha vâta, nâmo ei viasazy saih-u, lapinô kâhta ta nama hnei thei nawpa a châ khia cha, nama paru hapa chhao ta keila apei tah vana. Chô Khazoh chhaota âchâ pyhkhei ei nata khâchâ eipangiasa.
He tlupota apasyupalipi ta atakô kô 2014 pa lia chhaota lapinô eima hnei hei leipa a châ khiata la, kei ama viasapa he eiku eisi habâ aw. Paw Râhly reisa ta, “Lapinô hneipa he hmo nao kawpa châvei” ata tyh. Adona kao hlupi chhao a y. He hawta ama rei tyhna chhâpa he khâpa hro vâta châ leipa ta, ama kô nata thla zy uthei tuha bâ ta, ama thisaih apadâh hapa vâta ‘Confidence’ hnei khao vei ei. Liahsa ta ta ama riah achhie ha. Cha vâta pahno khei thai awpa âmâ ngiah kaw.
Achhâ chaina liata ei reih khopa cha, he ama moh chakhipâpa ta eivaw palâsapa nazy he ei viasa kho chaipa nata kyheipachâ chaipazy châ eita, he hawpa ei viasa nazy duahmo liata âduahpa ‘Satlia Senior’ ama tahpa nazy kha, atakô kô 2014 pa liana heta cha lapinô hnei âchhua chyu eisu vy. Lapinô hneipa he pitlohna nata ato kyh liata laihsana a châ tahpa he khâ eima palôrupa liata riepa ta, laiseih mawsy. Hâkô tawhta cha atlâhpa ta y eisala, ‘Ano paw’ ‘Puhpa’ tahpa ta eima cha aw thei babâ nata khâchâ pangiasana ta, thlahchhâna chhaota eicha vaw bao aw ei. Cha cha nâmo ei viasa kho kawpa nata kyhpachâ chiapazy châta eitao thei chhôpa a châ.
Nama zydua ta Kôthiehpa ‘Samaw’ eicha hlâ ei. Eichâ ly kaw ei.
No comments:
Post a Comment