EI THYUTLIA HEIHZY HNOTA EICHÂ PAPHAOPA HNÔH CHAIPA

Atakô he Khazohpa ngiachhiena vâta Mara thyutlia saw zy eima hra kaw khia ma tahna eiza hnei. Apachai pata facebook liata thytliapa hlupi zy ta ti nata râh, Mara rah châ ta eima saduthliena nata eima kho dâh zy akawh kawpa ta rei ty pita, pachâdâh nata hmô dâh chhao âlyu khai tyh vei. Cha hawta aza châ nota, keima cheingei chhao heta Facebook he kô 7 daihmâ tlai eivaw hmâh habâ hra nata, eithôkhei ngâsâ ha. Eipachâna nata eisaduthliena zy lai zaolao pata ei chapai tyh hra.

Anodeikua, ei rei kho chaipa deikua cha he bie he a châ. Marâ pa phopi padua awpa heta khâpa he ma eimâ ngiah/peimawh châi tly? Mara râh tlâh nawpa heta nâma nata keima heta khâpa hmo ma eima tao hra aw? He maophaohna he nâma ku liata a ypa hawta nâ pahno beih ma? Na râh heta âchâhnaw kawpa hawta nâ pahno beih ma? Nâ pahno leipa a châ khia tala Nationalism chhôsolôpi phaoh/hnei awpa ta, nâma khan â ‘baptisma’ tua awpa ângiah thlyu aw.

Bie hlupi za reih awpa eikho kaw taraw pata, bie nata hla athai kawpa eichâ leipa vâta, Marâ pa phopi padua awpa ta; keima mopakha ta ei palôrupa liata eiza paveih tyhpa nata ei pachâ peimawh kaw tyhpa, ei thyutlia heih zy lâ liata eirei kho kawpa he âpazi pata eiza reih laih tua aw.

MARA REIH PASÂHSA TA PABOHSA AWPA HE THYUTLIA SAW ZY MAOPHAOHNA A CHÂ

Mara pa phopi padua awpa ta a peimawh kawpa he khâpa hmo hema a châ aw?Chi nata Pho pabohsa nawpa heta khâpa chhaichhi he ma pha cha awvâ? ‘Reih’ Mara reih tlai he a châ. Atahmâ no tawhta Mara reih pasô na châh pahno leipa ta eima khâsi vei khia ta cha, atahmâ tawhta kô 10 pa liata cha eima râh chhô liana heta Mara reih thei awpa y khao leipa awta, Mara pa deikua y taraw hra eisila, reih thei awpa a y khao vei khia ta cha, Chi nata Pho alei pa eima châ habâ aw. Mara pa tahpa ta reih awpa y khao aw mapi. Mara reih pabohsa ta, cheichaloh laih lymâ awpa heta thyutliasaw zy eima maophaohna âsâh kawpa ta ei pahno. Chavâta thyutliasaw zypi ta atahmâ tawhta cha, Mara reih hmasie via nawpa ta SMS,Facebook nata Internet etc liata zy Mara reih he hmâh hlu via lymâ eisu vy. Tlaikao reh ta sms “Mate kangai che” tahpa hlâ ta cha, na pikheipa reih Mara reih cheingei ta, “Eidao…eicha vâ kaw’’ tahpa he hmâpachhi tua rai ângia via syulyu!

MARA PA PHOPI PADUA AWPA TA THYUTLIASAW ZY EIMÂ TIVY TUA AWPA ÂNGIAH

Ei rei chiehpa hawta atahmâhlâ he facebook liata Mara râh pawlitiks chôchâh reihpa ta nata âeichhia pata thyutliasaw hlupi âchiavo pata eimâ hmaoh pakhy hôlô, âly chhao âchhi hmeiseih. Anodeikua, Mara thyutlia zypi he nô nata paw kalachhôh lia eima y chhô nata, Top-up khô nawpa nata Internet Pack khô nawpa dâdei chhao eima nô nata paw, chhôkha zy eima hiah thlâh chhô heta la,Mara râh châta eima saduthliena nata eima ‘Dream’ zy he khâpasisaw leipa haw deita a châ aw. Asia kawpa ta âlâpa nata âhno thlâh hapa cha, Satlia pakha heta âtlyh chyta Facbook liata MDF/Congress pha leizie nata ama hmo taodâh akho leina zie reih pata, MDF/Congress cha Mara râh châta Party pha chaipa a châ zie a thata a reih ty. Thyutlia thokhazy deikua cha Neutral kawpa ta MDF chhao Congress chhao, MNF etc chhao reipachhiepa ta, ama reipapha tyh. Anodeikua, kha thyutlia paw kha âtlyh daihti vaw châ ta, Vote pathla âvaw daih ha ta, pangiasa leipa pita- Congress a vote syulyu ha chamaw! Khazia rimâ maw? Facebook lia cha râh kyhapachâ kaw mâmawh? Achhâpa cha he vâna heta tlâ châ veima? Nô nata paw, Chhôkha kalachhôh liata a y thomo thlâh hapa cha achhâ chhâna last moment liata cha anô nata paw, Chhôkha zy ta ama pahnie (Convince) ha pyly. Yzie za hnei khao vei.

Cha hawpa duahmo liata âduahpa eima châpa vâta Mara pa phopi padua awpa ta ahmeiseihpa tlâi ta keih chakâ awpa he aru ngaita kaw. Thyutliasaw eimâ tivy ha khia ta cha riahpha kawpa ta ahmeiseihpa (Practical) ta nata riahpha kawpa ta keihchakâ awpa chhao eima ngâh aw. Chavâta hy unawh, Nâma mopakha kha âvaw tivy ha tuala, cha tita la thyutliasaw zypi heta Mara phopi eima padua thei aw.

MARA THYUTLIASAW ZYTA ZYHNA KYH PACHÂPEIMAWH EISU U

Khâpa hmo rai tao eisila hmia eima pasah awpa cha eima Krizyhna he a châ. “Na chakao kho leipa chi nata pho cha, pahleipadia pata y tlô awta” tapa bie he eima nahkao ta athei hlu kaw! He bie he bie dopa, bie hrohpa a châ. Khazohpa apahno leipa nata achakao kho leipa chi nata pho he Khizaw liata nawh na lâ ama pangai via laih lymâ.

Mara thyutliasaw zypi ta Khazohpa pahno eisila, ato kyh liata hmia eima pasahpa a châ khia ta cha, sapa nata thlapa liata byhna to awpi ta, râh châ chhao ta byhnâ eima tlôkhei thei hei aw. Pari pangana chô ta “Marasaw” ta thlâthli pa heta khâpa râh rôhnapa hmata mania tlôkhei beih awvei. Abeipa eima Khazohpa eima pahnopa a châ khia cha eima chuna nata eima hmo taona kyh lia maih ta byhna piepa ta eima y aw tahpa he bie dopa nata bie y chiehpa a châ. Chavâta, Mara thyutliasaw zypi ta eima Khazohpa he pahno eisu u.

NÔPAW HMIATUAPAZY NATA RYUREIHTUHPAZY THLAHSANA CHÂH PAHNO EISU U

Thyutlia thokhazy pi ta nôpawpazy pakah tawhta ‘sâlâ’ tahpa reikah eima hlao châh aza y tyh. Facebook liata reichhona (Comment) eima pie dâh nata eimâ chhy dâhzy he achâh ta cha mo âdy leikaw tyh. Reihchhona eima pie hlâta he zy he chhôsolôpi liata he zy he khâ âthei thlâh ha eisila tahpa eikhoh kaw.

Mara pa phopi padua awpa ta riethei thachhâ panaopa chhao âpapeisa leipa ta, o nata lyu siesai ta, mathlai chhao ta noza hmiachhie âla laina chôta keih a chakâtuhpazy ama châ. Taheina thâlâ cha, atahmâ ta râhkyhpachâ âtahpa thyutliasaw zy hry liana heta New Siaha tawhta Siaha Bazaar taih phei ta asie hopa chhao y mapi mâmy! PL Region ama hia daihti no nata District council eih-hrâhpa hmô awpa ta keih ama châkâ daihti no zy chhochhi cha ama rai, kha daihti nota sawkha rai sôh kawpa siesaipa ta nâma nata keima, Marasaw châ heta keih ama vaw chakâ. Cha nota nâma nata keima ta amah mo taochheina nata ama taopasipa sai reih/tlua pita, amah mo taopha pa deikua theilei pachâsapa ta reipa kho mapi. Apei chaimâh; bâhsai eisu u.

Tawhla, atahmâ ta eima râh nôpawpa zy chhao he amah mo taochheipa nata ama pado leina sai reipa thlâh ha leipa ta, amah mo taopha pa zy chhao reipa hra eisu u. Nâma nata keima eima pahno pa nata eima hmôpa khô lâ liata Mara râh châta zâ mokuramâ chhao khaih leipa ta, achhô azâ ta rai ama hria tyh taraw! Chavâta kheita rai châ hasala hy unawh; âsosi eisu vy.

Achhâ chaina liata ei thyutlia heihzy lâ liata eirei kho kawpa cha, nâma nata keima heta Mara phopi padua awpa ta taotheipa eima hnei hra na tahpa he pahno eisila. Khâpa kao liata chhâ aphana lâta Mara râh hmia phaozie he panano âchhuah eisu vy..

‘Mara râh nata Khazohpa châta’